前排介紹過「嫦娥之父」、「中國衛星之父」等對科技有重大貢獻嘅人物，今次就介紹埋「中國氫彈之父」于敏。于敏喺1961年開始參與氫彈原理研究，期間佢嘅名字都要保持機密，直至1988年，接近30年之後先至獲得解禁，令佢呢段時間好多研究成果都無得發表，而佢太太亦都係响解禁之後，先知原來丈夫係從事秘密工作。

于敏生於1926年，係天津寧河人，1944年考入北京大學工學院機電系，但兩年之後佢因為熱愛理論物理，決定轉去理學院物理系。畢業之後于敏被著名物理學家錢三強、彭桓武調到中國科學院近代物理研究所，期間佢同其他人合作，提出原子核相幹結構模型，填補中國原子核理論嘅空白。

1961年，錢三強邀請于敏參加氫彈技術理論研究，于敏二話不說就應承咗，意味佢要放棄個人學術前途、隱姓埋名咁工作。彭桓武曾經講過，當時中國無人熟悉原子核理論，于敏嘅工作可以話係完全靠自己。于敏就係由一張白紙開始，不斷自己學習、汲取外國信息，憑住努力，舉一反三咁研究理論，又領導小組廢寢忘餐咁計數，完成一篇又一篇論文，克服一個又一個障礙。喺4年之內，于敏等科技人員提交咗69篇研究成果報告，增加對氫彈嘅現象同規律嘅認識。

1964年10月，中國第一粒原子彈試爆成功，其後于敏隨即率領團隊進行核武器理論研究，喺氫彈原理研究之中提出由原理到構形基本完整嘅設想，並且解決咗一系列熱核武器大量關鍵理論問題。到咗1967年6月，氫彈試爆成功，標誌住中國核武器發展踏入新階段。諾貝爾獎得主、核物理學家玻爾訪華期間，曾經稱讚于敏出類拔萃、係「中國氫彈之父」。

原圖嚟自網絡。