今年建國70週年，有8人獲頒「共和國勛章」，其中一位係現年91歲嘅戰鬥英雄李延年。李延年由1945年開始參軍，參與過國共內戰、抗美援朝等多場重要戰役，退休之後佢去過多間中小學，以戰爭親歷者嘅身份講述歷史。雖然多年嚟獲頒唔少獎章，但佢認為所有榮譽都唔係俾佢個人，而係國家對所有烈士嘅褒獎，佢勸勉所有人要永遠銘記犧牲嘅英雄，亦因為咁，多年嚟佢都將大部分獲得嘅獎章捐俾博物館同軍史館。

李延年生於1928年11月，本身係河北人，出身於貧苦農家，17歲前做過養豬、廚師等工作，直至1945年日本喺第二次世界大戰投降之後，佢喺東北參軍，參加過榆樹、長春，東北夏季、秋季、冬季攻勢，遼瀋、平津、宜沙等戰役，立下唔少戰功，由戰士逐漸升到指導員。喺1950年4月，擔任指導員嘅李延年喺湖南省嘅戰鬥當中，以2人傷亡嘅代價剿敵超過200人，捉拿幾十名俘虜，受到上級表彰。

韓戰爆發之後，李延年隨志願軍抗美援朝，期間奉命對失守嘅346.6高地進行反擊。李延年回憶，當年進攻時發現敵人每隔3分鐘左右就會發一輪炮，掌握呢個規律之後，士兵就用呢個空隙向前推進，最終成功搶返高地。但呢個時候，全營嘅彈藥嚴重不足，部隊就去敵方前沿收集敵人遺棄嘅武器同彈藥，擊退一波又一波嘅敵軍，有戰士用晒啲彈藥之後，就拎住爆破筒衝向敵方陣地同敵人同歸於盡，一個又一個戰友喺眼前倒下，李延年同戰友幾經艱苦，最後成功守住陣地。1952年11月，李延年獲志願軍總部頒授「一級英雄」稱號、記特等功1次，亦獲得北韓頒授自由獨立二級勛章。但呢段悲慘嘅經歷，就成為李延年永不磨滅嘅回憶。

原圖取自網絡。