上次阿史就同大家介紹講太平山街同卜公花園嘅故事，上世紀除咗鼠疫橫行，天花亦都係其中一種傳染性同埋致命率高嘅疾病，為咗防治呢種疾病，就有「東華痘局」嘅出現。

依家同東華痘局有關嘅遺蹟，大概就得返堅尼地城呢塊拱形牌坊同埋奠基石。喺1901年，喺惠民道花園位置，曾經就有「東華醫院西環分局」，當時係用嚟做防疫診所，收容鼠疫患者。但冇幾耐，另一種嚴重嘅傳染病天花亦都開始爆發，而當時嘅華人亦都唔相信西醫嘅治療，於是1907年政府就只好將呢個診所改做痘局，1910年正式啟用。

呢間痘局由東華醫院管理，主張用中藥治療天花，並且會幫華人接種牛痘疫苗，而當後來天花慢慢喺香港絕跡嘅時候，東華痘局亦都功成身退，喺1938年改做傳染病醫院，並且交返畀政府管理。而去到二次世界大戰結束之後，醫院就被拆卸埋，當時嘅市天局就立咗拱形牌坊及奠基石去紀念呢段歷史。

原圖嚟自網絡