「啟德」命名係同何啟、區德有關？

前排港鐵屯馬綫一期就正式開通，啟德站亦都開放，提起「啟德」呢個地方，唔知史友們又會諗起咩呢？啟德機場、定係何啟同區德呢？

雖然今日所提到嘅「啟德」同當年嘅地域概念上有啲唔同，但就一定要提下呢兩位仁兄，因為呢個地方嘅命名同佢哋有好大嘅關係。20世紀初嘅「啟德」，地理上嚟講係九龍東嘅一塊土地，並無進行太多嘅發展。當時就有兩位商人，分別叫做何啟同埋區德，佢哋合資經營咗一間公司，叫做「啟德營業有限公司」，專門响九龍灣北岸進行填海工程，本身係諗住將呢個地方發展成高價嘅花園住宅區，填海得出嚟嘅地域就照舊用佢哋嘅名命名，叫做啟德濱。

但由於1920年代發生過兩次嘅大罷工，令到工程延誤而且收入大減，只係進行完第一期工程嘅啟德公司亦都因為咁而倒閉。1925年嘅時候，亞拔飛行學校及皇家海軍赫米斯號就開始租借第一期啟德嘅填海地用嚟停泊戰機及戰艦，後來仲進行埋二、三期填海，1930年落成咗機場。由於喺「啟德濱」上建成機場，所以當時港府都用返「啟德」命名。