由九龍城請嚟嘅侯王—東涌侯王古廟

上星期阿史就同史友們講過一條喺古代大澳同東涌居民相互往來嘅古道—東涌古道，呢條古道上面有好多歷史悠久嘅古蹟，有史友就想阿史介紹多啲，咁阿史就由呢間侯王古廟開始講啦！

東涌侯王古廟，依家係香港一級歷史建築，位置上係喺東涌灣隔離，今日嚟講都幾偏僻。呢間侯王古廟已經有二百幾年歷史，按建廟果陣留低嘅大鐘推算，呢座古廟應該係喺清朝乾隆三十年，即係1765年建成。三間兩進設計嘅古廟，入面所供奉嘅係南宋名臣楊亮節。

講起侯王古廟，歷史更悠久嘅有九龍城侯王廟，咁到底點解東涌又要再起一間呢？原來當年呢一帶嘅村落發生瘟疫，居民就想請神嚟制服瘟疫，咁就諗起楊亮節，所以就特意去九龍城請佢返嚟。亦都有個講法話，係因為楊亮節曾經喺東涌灣為保護宋帝昺而同元軍開過海戰，所以就要起座廟宇供奉佢，但邊個講法先係啱，依家已經好難印證喇！