香港有對「鬼佬門神」？

有關門神嘅故事，以前阿史都講唔少喇！對於門神係邊個，唔同年代都好似係有所不同。之但係，响香港就曾經出現過一對有特別嘅門神，有幾特別？因為佢哋係「鬼佬門神」。

呢對「鬼佬門神」，係新界吉澳天后宮一個好出名嘅故仔。响呢個歷史悠久嘅天后廟，好多年前就有兩位啹喀兵替廟宇翻新，點知唔小心打瀉油漆，遮住咗原本個對門神。兩位啹喀為咗補鑊於是就重新畫上門神，但佢哋又唔係好記得門神本來嚟點樣，於是就靠記憶同發揮想像力，於是就完成咗一對「門神」。當然，呢對門神結果個樣就同傳統門神有好大出入，唔少居民仲話似「鬼佬」（昔日香港人對外國人嘅稱呼）多過似中國人，結果吉澳天后宮就出現咗一對「鬼佬門神」喇！

今時今日如果史友們去吉澳睇睇，都仲要會見到呢對門神，不過佢哋已經被請咗入廟內，因為原本對門開始霉爛，天后宮已經換上新門，「鬼佬門神」亦唔需要再守門喇！