如果有史友去過西營盤，對於一座好古舊嘅建築可能都會有啲印象，雖然上面寫住係明愛凌月仙幼稚園，但依稀都會睇到牆身上仲留有「凌月仙小嬰調養院」嘅字眼，到底當中又有點樣一段故呢？

咁就要由高街同薄扶林道交界開始講起！其實明愛凌月仙幼稚園嘅旁邊，正正就係李陞小學，呢兩座建築物都有一個共通點，就係都係由香港首富李陛家族所捐贈，據講係由李陞第八子李寶椿為咗延續李陞興學育才嘅理想而捐贈嘅。

明愛凌月仙幼稚園嘅前身，喺1879年嘅時候仲係天主教聖心小堂，後來當區內有另一座聖安多尼堂建成之後，天主教教區將業權轉畀嘉諾撒仁愛女修會，等佢哋可以籌建一座孩童寄宿嘅聖心學校。點知喺1907年嘅時間因為傳染病爆發，令到學校停辦，只好將原址改建成託兒所及孤兒院，李寶椿喺戰後重新捐款重建，並且喺1949年完工，四層高嘅建築以母親凌月仙而命名為「凌月仙小嬰調養院」。

咁呢度又係點樣變成幼稚園呢？原來喺調養院建成之後，政府就負責管理呢度，仲將調養院醫療設施移到舊山頂道嘉諾撒醫院，呢個地方就喺1968年轉型做凌月仙嘉諾撒幼稚園，後來就由明愛接手。

原圖嚟自網絡