荃灣山上山下都有三棟屋村？

史友們如果去過荃灣，都知地鐵站綠陽新邨附近有一間三棟屋博物館。而熟悉荃灣嘅史友，亦應該會知道响荃灣象山邨附近又有三棟屋村。嘩！呢條村咁犀利山上下山都係村嘅範圍？非也非也。

先介紹下三棟屋村，呢條村係一條擁有200年歷史嘅客家原居民村落，原來位置就係响依家荃灣站一帶。之所以叫三棟屋係因為條村最初只有一座三進口嘅房舍，呢座建築物分為三部分，即是宗祠、中廳和下廳，每一部分屋頂都係由一條橫樑所承托，因橫樑又稱為棟，所以就叫三棟屋。

到咗七十年代，已經發展成新市鎮嘅荃灣要興建地鐵，而三棟屋村附近就係地鐵站選址，而鐵路都會經過條村地下。所以當時政府就同村民提出將居民安置响老圍象山一帶。最初村民唔肯，但最後就配合政府安排，原居民被安置嘅地方就係依家荃灣象山邨附近嘅三棟屋村喇！而原來嘅三棟屋，响1981年被列為法定古蹟，後嚟更成為三棟屋博物館。