元朗有座香港現存唯一清代客棧？

繼續同史友們介紹每區嘅香港歷史建築，中式傳統建築好似廟宇、書室、祠堂都同大家介紹過唔少，咁客棧大家又聽過未？喺元朗舊墟利益街20號，就有一座香港現存唯一清代客棧，呢座就係同益棧。

提起呢座咁有意義嘅歷史建築，史友們可能都想知道佢係幾時建成，但係好可惜嘅一點就係，呢座建築物建成嘅年份已經無從稽考，只係知道喺1899年英國接管新界之前，同益棧就已經存在，所以至少已經有120年嘅歷史喇！同益棧所在嘅位置就係元朗舊墟，呢個地方早喺1699年就係由鄧氏鄧文蔚建立，專門畀新界居民銷售農作物同埋日常用品。元朗舊墟興盛咗幾百年，商業活動頻繁亦都令到唔少商店、客棧應運而生，同益棧相信就係專門招待喺墟日期間嚟自各鄉商旅而設嘅旅館。

隨住1915年元朗新墟成立，舊墟逐漸衰落，樓高兩層嘅同益棧慢慢就只係得返住宅用途喇！