尋日响科大教職員宿舍附近山坡地盤，發現有一條神秘隧道，古蹟辦接報後就馬上派人去睇睇調查下。近期香港興起古蹟熱，自然引起唔少人討論，其中一個講法就係話呢個可能係軍事設施。

點解會咁講呢，原因就係現今科大原址舊時真係一個軍事設施，就係一個軍營喇！不過係未建成個隻！呢個計劃起嘅軍營叫高希馬兵房，位於清水灣半島北部。不過，呢個兵房其實係一個爛尾項目。據科大創校校長吳家瑋响回憶錄憶述，响上世紀七十年代政府本來打算响呢個地方興建英軍軍營，到八十年代展開咗工程，但後嚟中英兩國簽咗《中英聯合聲明》，確定九七回歸，所以呢個軍營未起好就爛尾。當時呢個爛尾項目就因為已經做咗唔少剷平山坡工程，所以政府就計劃將呢個地方發展成渡假村或者專上學府，最終就成為香港第三間大學嘅選址，亦即係香港科技大學喇！

咁至於啱啱發現嘅神秘隧道係咪同高希馬兵房有關呢？留返俾專家解答啦！

原圖：hkust.edu.hk