一代巨星張國榮 逝世十九周年

今日係四月一日愚人節，但對港人嚟講，最印象深刻嘅就係2003年嘅今日，張國榮「哥哥」喺呢一日離開咗大家。

出生喺1956年嘅「哥哥」喺1977年憑住《American Pie》一曲喺亞洲業餘歌手大賽獲香港區亞軍而正式出道，雖然早年由於形象太前衛，推出嘅唱片仍未受落，但去到1983年憑住第二張粵語唱片《風繼續吹》而嶄露頭角，後來喺1984年更加有《Monica》呢首歌令佢正式成名。

全盛時期嘅「哥哥」甚至可以喺十大勁歌金曲季選中獨佔七首歌，同時亦都喺影壇取得輝煌成就，就好似有《英雄本色》宋子傑、《倩女幽魂》寧采臣、《胭脂扣》十二少、《霸王別姬》程蝶衣等等，都係深入民心嘅角色，甚至佢仲憑《霸王別姬》成為首位主演電影而獲得奧斯卡金像獎最佳外語片提名嘅香港演員。