天台學校

前個排有史友响史檔留言板貼咗張天台學校嘅照片，阿史覺得好得意，點解會有學校喺天台嘅呢？好奇心驅使阿史去搵搵關於天台學校嘅歷史。

天台學校最早出現於1950年代，當時教育並唔普及，好多基層家庭都負擔唔起子女嘅學費，加上戰後香港人口急速增長，解決兒童教育問題就成為當時港英政府一個目標。喺1953年12月，石峽尾木屋區發生大火，好多居民無家可歸，政府為安置災民於是興建多幢徙置大廈，更利用徙置大廈的天台開設學校，等住响徙置大廈同附近住嘅小朋友有書讀。隨住政府喺各區起公屋，天台學校大行其道。有响天台學校讀過書嘅前輩話，最初嘅天台學校真係喺天台上堂，學生同老師日曬雨淋，後期嘅天台學校就有課室，環境算係改善咗。前輩仲話，雖然天台學校環境唔係太好，好似佢哋返學校要行好多層樓梯，但因為返學機會好珍貴，所以大家讀書都好用勤咁話。

到咗六七十年代，政府喺規劃公屋屋村時都預留咗地方起學校，天台學校漸漸走向式微，唔少天台學校都搬咗去獨立校舍。始終天台學校最初只係解決教育問題嘅權宜之計，所以當獨立嘅標準校舍出現之後，天台學校就逐漸被淘汰，完成香港教育改革路上嘅光榮使命！