唔知史友而家仲有無睇《警訊》，阿史以前後生嗰陣都成日睇依個節目，了解最新嘅犯案手法同騙徒伎倆，避免中招。其實《警訊》有超過四十年歷史，而當年首主題曲「憑自我，硬漢子，拼出一生癡」，可以話係相當深入民心。

《警訊》早喺1973年開始，就由警察公共關係科同香港電台合作拍攝，目的係宣揚滅罪訊息，促進警民合作。阿史以前最鍾意睇嘅，就係嗰啲案件重演，直情當係短劇咁煲。案件重演入面嘅賊人、學生妹、師奶等角色全部入型入格，報道話原來節目監製落咗好多功夫，選角時有一項最重要嘅條件：好壞分明，好似扮賊嘅演員一定要成個賊咁樣，令觀眾一睇就知佢係衰人，務求令男女老幼都判斷得到，對罪案同賊人加以警惕。

陪伴大家走過咁多年，《警訊》見證住當年嘅炸彈大案、持械行劫等犯罪模式，變成今時今日嘅高科技犯罪，方法雖然唔同咗，但大家依然都要提高警覺，了解相關資訊，保障自己置於，亦可以令香港繼續成為一個安全嘅城市。