上次提到嘅《展拓香港界址專條》入面，除咗提到英國向中國租借新界99年外，亦提中國保留咗九龍城（即係「城寨」）嘅管轄權：「所有現在九龍城內駐紮之中國官員，仍可在城內各司其事」、「至九龍向通新安陸路，中國官民照常行走」，即係話中國官員可以繼續喺城入面駐守、工作，同時可以如常經陸路往返新安（即係而家深圳、東莞等地）。

其實城寨嘅歷史可以追溯去到南宋年間，絕對係歷史悠久。九龍城寨又被稱為九龍砦城，係一座石頭城。去到鴉片戰爭之後，清廷將香港島割讓咗俾英國，為咗加強防衛，於是响1846年11月至翌年5月修築咗呢座九龍城，並派官員同士兵駐守。到咗1898年，中方為保尊嚴，就响《展拓香港界址專條》入面，要求保留九龍城嘅管轄權。

不過無幾耐，英軍就違約驅逐城內嘅清廷官員同士兵，自此歷屆中國政府都無再派官員進駐九龍城，但每次港英政府想拆卸城內華人住所嘅時候，都遭到中方強烈抗議，如是者就令九龍城寨成為三不管嘅地方。直至1984年《中英聯合聲明》簽署，中英雙方同意港英政府清拆九龍城寨，令嗰度漸漸改頭換面。

原圖嚟自網絡。