北韓最近係咁發射不明飛行物，被外界認為係試射導彈，搞到區內各方密切關注。由五十年代韓戰爆發至今60幾年，南北韓雙方一直都未簽署和平協議，韓戰並未正式結束。咁韓戰係即時發生？點解越打越「人多勢眾」？其實韓戰爆發要數返去 1950年6月25日嘅歷史，當時北韓軍隊突襲南韓，象徵戰爭爆發。戰事初期，北韓軍隊勢如破竹，9月初更一度將南韓軍隊迫到朝鮮半島南端嘅大邱、釜山。但到咗9月15日，由美國聯同15個國家組成嘅聯合國軍喺仁川登陸，隨即扭轉形勢，將北韓軍隊壓返去朝鮮半島北部山區同鴨綠江一帶。

去到10月初，北韓領導人金日成請求中國出兵援助，中方決定將東北邊防軍改組為中國人民志願軍「抗美援朝」。喺志願軍同北韓軍隊合作之下，先後經歷五次戰役，將聯合國軍迫返去「三八線」附近。此後雙方一直喺「三八線」附近拉鋸，直至1953月7日，雙方先至簽署停戰協議，停止戰事。

根據中國官方嘅數字，志願軍喺韓戰中有大約15萬人犧牲，而美國同南韓嘅數字就係有30至40萬中國軍人犧牲。上海社科院國際關係研究所所長劉鳴曾經講過，中國「抗美援朝」嘅代價雖然大，但就提升咗中國喺朝鮮半島獨一無二嘅影響力。BBC曾經採訪韓戰研究專家沈志華教授，佢講到因為當時少國家夠膽同美國對抗，唔少人對中國刮目相看，但帶嚟嘅負面影響係，韓戰打完之後，將中國推到冷戰最前沿。

原圖取自網絡。