上個禮拜三，有立法會議員名下馬匹參賽，馬會因安全考慮，取消當晚跑馬地馬場舉行嘅賽事，今次不如就講吓跑馬地馬場喇。跑馬地馬場可以話見證住香港嘅歷史，香港喺1841年開埠，英國人就將賽馬運動帶嚟香港，1845年有英國人嚟到而家跑馬地呢一帶，經過清理、開闢之後，將原本嘅沼澤變成馬場。

跑馬地馬場經過多年發展，就成為而家嘅模樣，亦係世上少數位於市區嘅馬場。除咗草地跑道外，而家仲有看台、博物館、馬會總部等設施。呢張相就係1955年跑馬地馬場。