喺1936年12月12日，發生咗一件對抗日戰爭、甚至未來中國政局意義深遠嘅事件，呢件事就係西安事變喇！

要知道早喺1931年9月18日，日本關東軍就發動咗九一八事變，中國東北三省就被日本關東軍全面佔領，並且利用咗前清廢帝溥儀喺東北建立偽滿洲國政權。所有嘅舉動亦都畀咗一個警號畀當時嘅中國，就係日本將會全面入侵。之不過，當時以蔣介石為首嘅國民政府並冇以抗日為首要職責，反而喺三十年代之時投入大量軍力去消滅中國共產黨嘅根據地。受到嚴重損失嘅共產黨當時就發動長征去到中國陝西，而當時蔣介石就調動東北軍同西北軍進行圍攻。

當時東北軍同西北軍其實已經對蔣介石嘅指令有所質疑，所以遲遲都未能圍攻紅軍。蔣介石眼見咁耐都未解決到，就自己親自去到西安督戰。喺呢個時候，東北軍同西北軍嘅主帥張學良同楊虎城為咗逼蔣介石停止攻打共產黨，於是响12月12日發動兵諫，將蔣介石軟禁喺華清池。

呢個消息當時震驚中外，而張學良同楊虎城通電全國，解釋捉咗蔣介石嘅原因，同埋要求停止內戰，一致抗日。最終，南京政府採取「和平救蔣」策略，經過多番斡旋同談判，蔣介石應承聯合共產黨抗日。之不過呢兩位發動兵諫嘅將領就冇乜好下場，阿史下回再同大家分解！

原圖嚟自網絡