台灣發生「二二八事件」

1947年2月28日，台灣就發生咗一件名為「二二八事件」嘅衝突，呢場維持三個幾月嘅衝突就引嚟武力鎮壓，除咗有大量民眾傷亡隨之而嚟嘅更加係長達38年嘅戒嚴，今次阿史就同大家講一講啦！

喺「二二八事件」發生之前，其實當時台灣喺政治上就已經出現唔少施政偏頗、官紀敗壞嘅現象、社會經濟更加出現通貨膨脹、失業人口擴大等等嘅問題，民眾對政府嘅不滿一直都喺度累積。而喺1947年2月27日，台灣專賣局查緝員因為喺台北天馬茶房查緝私菸果陣，將一位寡婦身上所有錢財充公，期間唔單止以手槍槍柄敲擊寡婦林江邁頭部，更加誤殺市民陳文溪。消息傳出之後，群眾罷市、罷課、罷工，遊行至專賣局抗議，但呢啲舉動就引嚟衛兵以機槍掃射，多人死傷。

雖然政府方面係以武力鎮壓，但仍然未能平息到呢啲衝突，甚至仲令到衝突全面蔓延到臺灣各大都市，各地民間力量組成武裝部隊企圖以武力達成目的。面對呢啲情況，當時台灣省行政長官陳儀就請求國民政府派出軍隊，結果喺3月8日開始高雄、屏東等地就出現清鄉行動，處決咗唔少台灣民眾，死亡人數估計有18000至28000人。