最近歐洲巴爾幹半島國家馬其頓，有幾百人衝入國會大樓搗亂，原因係民眾不滿國會選咗首位阿爾巴尼亞裔議長。

馬其頓係位於歐洲東南部嘅一個內陸山國，於1991年獨立。獨立前係南斯拉夫聯邦中經濟最差嘅成員國，目前仍然係歐洲最貧窮嘅國家之一。馬其頓除咗經濟麻麻之外，其他呢個國家內部都有唔少問題，包括國家名。

簡單而言，馬其頓响聯合國用嘅名係「前南斯拉夫馬其頓共和國」，而唔係就咁叫「馬其頓共和國」。咁點解呢？呢個就關係到歷史問題喇！馬其頓其實本身係一個地區名，若果講到馬其頓地區，除咗馬其頓共和國外，仲包括希臘、保加利亞、阿爾巴尼亞、塞爾維亞同科索沃嘅部分國土，所以馬其頓共和國同馬其頓地區其實係兩個唔同概念，馬其頓地區其實係接近古馬其頓王國嘅概念。

亦因為咁，馬其頓共和國以「馬其頓」名義立國，就惹嚟鄰近國家以及各地嘅馬其頓人不滿。好似希臘咁，佢哋覺得古馬其頓人為古希臘人嘅一支，國境東北本身就係响馬其頓地區，所以馬其頓共和國根本唔應該用上「馬其頓」作為國名。