最近，巴林、沙特阿拉伯、埃及、阿聯酋、也門同利比亞等中東同北非國家，先後宣布同海灣國家卡塔爾斷交，沙特阿拉伯同巴林仲發聲明話卡塔爾支持恐怖主義同極端主義活動。中東地區作為一帶一路國策嘅重要部份，局勢發展到咁真係值得各位「好友」注意。

卡塔爾係全球其中一個最富裕國家，主要收入來源來自開採石油同天然氣。响未發現石油之前，卡塔爾以採珠業馳名，20世紀初期，卡塔爾係英國响中東一個重要據點，但响二十世紀五十年代，英國海外殖民地出現獨立潮，英國亦開始放棄在中東的大本營，1971年卡塔爾正式成為主權獨立的國家。

講返轉頭，點解今次會有咁多國家同卡塔爾斷交呢？事緣卡塔爾新聞社發出一段報道，話國家元首埃米爾話「伊朗係不容忽視嘅伊斯蘭強國」，仲話「對伊朗懷有敵意係不智」。問題嚟喇！以沙特阿拉伯為首嘅海灣合作委員會，一直對伊朗甚為敵視，遜尼派王室統治嘅沙特阿拉伯，同什葉派嘅伊朗勢成水火。雖然卡塔爾好快否認「報道」係駭客所為，但成件事已經一發不可收拾。

事實上，卡塔爾同沙特阿拉伯之間本身已經有唔少矛盾。卡塔爾長期受制於沙特，而卡塔爾就一直希望可以响區內有更大影響力，近年積極拉攏美國，又積極介入地區事務，擔當調停者同中間人角色。不過，卡塔爾响2010年爆發嘅「阿拉伯之春」浪潮當中，仲支持各個伊斯蘭主義勢力，而呢啲伊斯蘭主義勢力唔多唔少又同各地反政府力量甚至恐怖主義組織有所關連，呢啲亦係中東北非各國對卡塔爾有戒心嘅原因。所以，當個段向伊朗示好嘅假報道一出，可以話觸動咗區內國家嘅神經。另一個講法係，特朗普上台之後，對打擊恐怖主義嘅決心比奧巴馬大，呢個亦成為咗沙特敢於同卡塔爾斷交嘅原因之一。