唔知大家最近有無留意國際新聞，阿史想講嘅係中國同印度又出現邊境爭議，中印兩國响邊境增兵對峙，氣氛一度緊張。印度作為一帶一路國家之一，中印兩國點樣處理呢個歷史遺留落嚟嘅問題，對未來兩國點樣合作會有一定影響。

中國同印度之間嘅邊境爭議拗咗幾十年，中印邊境爭議簡單可以分為西段、中段、錫金段和東段的邊界問題，每段邊界爭議都有唔同嘅歷史背景。好似東段咁，1914年，英國和西藏地方政府，雙方同意劃定「麥克馬洪線」將喜馬拉雅山麓以南地區（藏南地區）劃入印度，但當時中華民國並唔承認呢個劃定，到咗印度獨立同中華人民共和國成立，中印就呢個地區嘅主權問題始終無解決過。西段方面，印度同巴基斯坦响二戰後脫離英國獨立，喀什米爾地區就出現咗被印度、巴基斯坦同中國分佔嘅局面，而印度就認為成個喀什米爾地區都應該歸入印度。

咁多爭拗，結果响1962年6月中印之間就發生軍事衝突，到咗10月各綫都出現衝突，稱為中印戰爭。不過，印度就唔係好夠中國打，印度軍西綫、東綫都俾中國軍隊打敗。之不過，中國方面打贏印度之後又無條件退兵，原本收復返又有權爭議嘅9萬平方公里領土就咁放棄咗。所以後嚟有人就話响中印戰爭中中國只係想叫印度唔好亂嚟，亦稱呢場仗為自衛反擊戰。

呢場戰爭之後，中印之間就呢個地區邊境爭議就持續咗幾十年，有時會發生軍事衝突甚至開戰，有時係兩國嘅外交爭議。直至今日，爭議仲未完。