講到一帶一路，唔知點解香港傳媒間間都會聚焦中亞嘅哈薩克，可能係香港有飛機從香港直飛去阿拉木圖。不過，阿拉木圖就並唔係哈薩克首都，呢個國家嘅首都叫阿斯塔納。

阿斯塔納位於哈薩克中北部，原名係阿克莫拉，係哈薩克第二大城市。本來哈薩克首都係阿拉木圖，不過呢個位於國家東部嘅城市，响發展上遇到唔少問題，好似响地震帶上，另外就係同其他國家太近，唔係好安全，所以响哈薩克响獨立後就有遷都打算。

但問題嚟喇！阿斯塔納呢個地方有一個好大嘅問題，就係冬天時非常之凍，零下廿三十度都唔係乜嘢特別事。不過咁，呢個城市依家已經成為咗全球其中一個最矚目嘅城市，因為呢個城市依家興咗各式各樣嘅建築物，好似蘇聯式、伊斯蘭式、中亞式、歐式、甚至超現實主義嘅建築物，都可以响呢個城市搵到。原來，一直擔任國家元首嘅總統納扎爾巴耶夫，希望投入龐大資金同無窮創意，去打造呢個年輕首都成為全球焦點，吸引有冒險精神嘅人才同企業嚟呢度發展。據統計，阿斯塔納嘅建設已經投入超過1200億港元嘅資金，而市內又真係有超過一半人口年齡係30歲以下。如果大家對一路一帶有興趣，阿斯塔納可能係一個值得去嘅地方。