蘋果教父喬布斯就喺2011年今日逝世，當時阿史身邊好多果迷都好傷心遺憾，時至今日都感到可惜。喬布斯曾經七次登上《時代雜誌》封面，被認為係當時全球最成功嘅商人之一。佢唔單止開創咗蘋果公司，仲推出咗iPod、iPhone、iPad、iMac呢啲劃時代嘅新科技產品，改變咗全球人用電話、電腦嘅習慣，佢對簡約同便利設計嘅推崇，更加令佢贏得眾多忠實粉絲。

喬布斯入讀里德學院之後，認為讀大學花費大量金錢但學唔到乜嘢就決定休學。喬布斯喺讀書年代識咗拍檔沃茲尼亞克，佢哋1976年成立咗蘋果公司，製造咗世界上商業化最早嘅個人電腦——Apple I。Apple I取得初步成功之後，喬布斯仲搵埋馬庫拉入夥研發Apple II系列。後嚟馬庫拉辭任執行長一職，喬布斯又搵咗當時百事可樂嘅總裁擔任。

但係，隨住Mac機喺1984年嘅銷量下跌，加上沃茲尼亞克同其他開發成員嘅離開，喬布斯被董事會同大部份員工排擠。於是，喬布斯翌年辭去蘋果董事長職務，另起爐灶成立咗NeXT公司。不過，新公司嘅銷售額並唔理想，喬布斯後嚟收購咗佐治·魯卡斯（George Walton Lucas）旗下嘅電腦繪圖部門，成立咗Pixar，作品包括1995上映嘅《反斗奇兵》。

1996年，蘋果嘅經營管理陷入困局，最終決定以收購NeXT嘅方法取得NeXT嘅作業系統同開發人員，喬布斯因此回歸蘋果。喬布斯開始重整蘋果公司，並喺2000年起成為正式CEO，帶領蘋果開發iTunes，陸續推出iPod、iPhone、iPad。蘋果嘅業務蒸蒸日上，不過喬布斯嘅身體就出現健康警報。由1997年開始佢患上腎結石，2003年發現有胰臟腫瘤。响多次蘋果產品發佈會入面，大家望住佢日漸消瘦。最終，佢喺2011年8月辭任執行長一職，同年10月病逝，無緣見證蘋果今年8月市值突破一萬億美元嘅里程碑。