上星期介紹過歐亞內陸海裏海，因為天然資源而令沿岸五國出現一啲政治角力，其實裏海呢個地方仲有一樣嘢好出名，就係魚子醬喇！

號稱世界（其實只係西方國家）三大珍味之首嘅魚子醬，係唔少人趨之若騖嘅美食珍品。所謂魚子醬，其實就係鱘魚嘅魚卵。响歷史上，許多歐亞國家嘅統治者將魚子醬定為上流社會嘅專享食品。即使到咗今時今日，都被唔少人視為佳品。而响市場最上等嘅魚子醬，就係產自裏海中嘅鱘魚貝魯嘉鱘、賽魯佳鱘、奧西特拉鱘，當中貝魯嘉鱘每年產量不足一百條，產量不足25,000公斤，真係矜貴到不得了！

不過，就係因為咁值錢，全球包括裏海在內嘅鱘魚都有濫捕情況，聯合國華盛頓公約組織亦將全世界野生鱘魚列為瀕臨絕種嘅保育類動物。裏海沿岸國家雖然有鱘魚復育保育工程，對魚子醬出口訂定嚴格配額，之但係由於魚子醬太有市場，非法捕捉鱘魚情況依然嚴重。