响亞洲同歐洲交界，有一個世界面積最大嘅內陸湖泊，呢個地方就係裏海。呢個被五個國家包圍嘅內陸海，近年成為咗呢個地區一個政治角力場。

包圍裏海嘅國家，東北為哈薩克，東南為土庫曼，西南為阿塞拜疆，西北為俄羅斯，南岸為伊朗，呢個內陸海嘅水源係來自伏爾加河、烏拉爾河同捷列克河。講到裏海，大家可能會諗起世界馳名嘅魚子醬，世界最高級嘅魚子醬就係來自裏海有嘅鱘魚。

咁點解裏海成為呢幾個國家嘅政治角力場？並唔係因為鱘魚，而係因為蘊藏响裏海嘅豐富天然資源。據估計，裏海石油儲量佔世界總儲量1%，天然氣儲量相當豐富。响以往蘇聯時代，裏海都被認為蘇聯同伊朗嘅內湖，爭議唔大。但隨著蘇聯解體，裏海沿岸國家就由兩個變成五個，爭議亦因而開始。好似俄羅斯、哈薩克同阿塞拜疆就仍為裏海係內陸海，應該《聯合國海洋法公約》進行劃界，以確立各國沿海開採權，但伊朗同土庫曼就堅持裏海係內陸湖，唔可以按海洋法作規定。雖然近年五國就呢個爭議通過裏海峰會解決咗唔少分歧，但爭議仍然未完全解決。

不過，近年美國同中國同裏海沿岸部分國家達成能源合作協定，為呢個地區嘅地緣政治增添咗不穩定因素。