响一帶一路國策當中，中亞國家係呢個大戰略當中扮演一個重要嘅角色。不過講到中亞國家，大家可能都會提哈薩克多啲，咁中亞其他國家又點呢？阿史今日就想簡單介紹下塔吉克。

塔吉克係中亞地區面積最細嘅國家，國土九成面積為山地，其中响中國古代稱為蔥嶺嘅帕米爾高原，部分就係响塔吉克境內。亦由於呢個國家地理環境唔係太好，所以長年以來經濟發展麻麻，以人均GDP嚟計，仲係中亞最貧窮嘅國家。

响近代歷史上，呢個地區就係受其他國家控制，帕米爾高原地區本來係清朝領土，後嚟就俾俄國佔領。响1919年，呢個地區建立蘇維埃政權，响1929年加入蘇聯，直至1991年宣佈獨立。不過，塔吉克獨立後出現混亂，1992年政府軍同反對派武裝力量爆發內戰，一打打咗五年，直至1997年先停火，內戰導致6萬多人喪生，過百萬人流離失所。另一方面，中國响塔吉克獨立之後曾經出現過邊境糾紛，兩國就從2010年起陸續達成協議，解決邊界糾紛。不過，中塔邊界問題其實未完全解決，之後係點就拭目以待。