虎豹別墅「地獄」任你遊

上星期阿史睇返一套好鍾意嘅日本卡通片，裡面講廚師主角去咗香港救間酒樓，去到香港仲去咗個好奇怪嘅景點，花園裡面有十八層地獄嘅佈置。

相信年紀大啲嘅史友，都知道卡通片講嘅就係虎豹別墅。虎豹別墅係已故華僑富商胡文虎及胡文豹兄弟喺1935年响港島大坑附近起嘅私人別墅，別墅依山而建，主樓係紅牆綠瓦的宮殿式房屋，結合中西建築風格，極盡奢華。虎豹別墅之所以咁出名，除咗佢本身建築風格特別外，別墅旁嘅萬金油花園係俾公眾享用，園內山坡上嘅「虎塔」同「十八層地獄」壁畫最為聞名。「虎塔」為七層六角形白塔，44米高，象徵「七級浮屠」；而「十八層地獄」壁畫就有齊十八層地獄嘅場景，斬頭、鈎脷筋、腰斬、上刀山、下油鑊，警惕世人少做壞事。

不過，依家大家就再無機會去到萬金油花園喇！因為胡文虎後人已經將撻地賣咗俾地產商起豪宅，本來虎豹別墅都無留低，好彩政府介入，別墅主樓先有得留低咋！