最近本港各大專院校民主牆出現「香港獨立」字眼，响中大因此激起兩地同學矛盾，中大前學生會會長周竪峰就鬧內地同學「支那」。中文大學新亞書院院長黃乃正發公開信，引入新亞書院兩位創辦人錢穆及唐君毅生前言論，認為周竪峰違背咗錢唐兩位先賢教誨，不過周竪峰就反駁話黃根本唔知錢唐生前嘅主張。

新亞書院係香港中文大學其中一間書院，坐落馬料水，山明水秀。之不過，新亞書院背後嘅故事就同中國近代歷史有非常密切關係。新亞書院創立於1949年，前身係亞洲文商專科夜校，由錢穆、唐君毅、張丕介等人創立，首任校長為錢穆先生。1950年改名為新亞書院，仲得到商人王岳峰先生資助搬入九龍深水埗桂林街校舍。

咁點解當年錢穆、唐君毅、張丕介等人咁艱難都要辦新亞書院呢？錢穆先生响新亞書院成立嘅時候，就寫明教育宗旨在於「上溯宋明書院講學精神，旁採西歐大學導師制度，以人文主義之教育宗旨，溝通世界中西文化，為人類和平社會幸福謀前途。」致力弘揚著重發揚中國傳統文化，就係新亞書院辦學嘅宗旨。

當時新亞書院嘅教員，都係來自大陸，好似錢穆教中國歷史、唐君毅教哲學、張丕介教經濟，崔書琴教政治學，仲有楊汝梅、曾克耑、左舜生、饒宗頤、羅香林等著名學者都响新亞書院任教過。除咗教員外，其實校內大部份學生都係從大陸逃難嚟香港嘅青年。據講最早期新亞書院只能租用九龍偉晴街華南中學三課室响夜間上課，後嚟搬去深水埗桂林街，環境認真麻麻。而學生好多都無乜經濟能力，所以早前新亞書院係經營得非常艱難。據新亞書院官網介紹，當時部分經費除咗來自遷台嘅國民政府外，張丕介同唐君毅都要撰稿補助書院。可想而知當年班學者為咗辦學，幾咁有犧牲精神。