當大家响新聞睇到北韓試射導彈同中印邊境衝突呢啲地緣危機時，唔知又有無留意東南亞國家柬埔寨同老撾有邊境糾紛呢？不過，兩國已經同意撤軍同會談，危機暫停解除。

阿史雖然無去過老撾呢個東南亞唯一內陸國家，但讀東南亞史時就好幸運地抽中以呢個國家作為功課題目，所以印象相當深刻。响中國古籍當中，已經對今時今日嘅老撾地區有所記載，最出名就出現响《真臘風土記》裡面。到咗十九世紀就淪為法國遠東嘅殖民地，直到二戰後嘅五十年代先正式獨立。

不過，老撾獨立之後，好快就捲入老撾王國（或稱寮王國）同共產軍事勢力巴特寮嘅鬥爭，亦成為南北越抗衡當中一個第二戰場，巴特寮就得到蘇聯支持，而寮王國政權就得到美國支持。但隨住美軍响七十年代決定撤出東南亞戰爭，原來老撾王國嘅國王西薩旺·瓦達納宣佈退位，巴特寮建立老撾人民民主共和國，老撾亦就此成為共產主義國家。

老撾成為共產主義國家後，實行計劃經濟，但經濟無乜起息，但到上世紀八十年代末先推行市場改革。但相對其他東南亞國家，老撾經濟較為落後，工業基礎薄弱，對外貿易國家主要為越南同泰國。但九十年代起中國經濟實力開始增強，近年已成為最重要貿易夥伴，而响2015年，兩國簽訂協議建造由老撾首都萬象至中國邊境嘅鐵路。至於老撾能唔能夠透過「一帶一路」戰略而令經濟起飛，仍有待觀察。