阿史之前講過世界上最大嘅酒窖，今日再同大家講一樣同樣入咗健力士紀錄嘅嘢——全世界最老嘅葡萄樹。

呢棵全球年紀最大嘅葡萄樹屬於詹托福卡（Zametovka）品種，有成400幾歲㗎，但就唔係出生喺出產葡萄酒嘅大國，而係生長喺一個有住童話式美景嘅小國——斯洛文尼亞。喺斯洛文尼亞嘅馬里博爾（Maribor），有一間老藤之屋（Old Vine House），呢棵最老嘅葡萄樹嘅藤蔓就依附喺老藤之屋嘅圍牆上面。佢見證咗奧地利日耳曼人同斯洛文尼亞原居民為爭奪馬里博爾而起嘅衝突；見證住馬里博爾成為斯洛文尼亞嘅一部份；喺1941年睇住德軍進駐馬里博爾；又避過咗二戰末期嘅轟炸……頑強咁生存到宜家。

正常嚟講，葡萄樹嘅產量會隨住年齡遞增而減少，好多葡萄酒大國嘅酒莊通常會定期重新種一批新嘅葡萄樹嚟確保產量，但呢棵葡萄樹生存咗400幾年，宜家每年竟然仲可以釀大概100瓶250ml嘅葡萄酒！不過當然，咁矜貴嘅酒就唔係人人都可以飲嘅，只係供應俾VIP客人享用。不過據飲過嘅人講：呢隻酒好澀，都幾難飲吓。