天文台點炮報颱風

香港啱啱經歷咗今年首個八號風球，作為打工仔一份子嘅阿史對於面對「李氏力牆」都仲可以獲得兩個鐘假期已經感到痛哭流涕(唔好理我係因為多兩個鐘頭假而感動，定係因為要迫巴士而痛哭)。

香港天文台現時所發出嘅颱風訊號其實係由1973年起沿用至今，喺之前都經歷過多次演變，但都係以數字識別颱風動向。一開始有齊1到10號訊號，喺1934年起就取消咗少用嘅2、3、4號，到1954年又增設返3號風球。喺當年仲有5、6、7號訊號時，佢哋分別用嚟識別颱風風向，不過好多人都誤以為數字越大表示颱風威力越強，天文台就索性喺1973年將5、6、7 號取消，直接用8號風球加風向取代，仲一直用到依家。

唔講唔知，喺1907年前，天文台會喺港口鳴槍聲發佈警佈，到後來用鳴炮或點炸藥取代，呢種報風方法要直到1937年先正式取消。