香港節

唔知各位史友有無聽過香港節呢個活動？

香港節係喺1969年舉辦嘅大型慶祝活動，由港英政府及商業機構共同贊助，與各區市民合辦，係香港開埠以嚟嘅首次同類活動。咁活動內容有乜嘢呢？各地辦遊藝晚會、嘉年華會、花車遊行、綵燈會、青年之夜、香港節小姐選舉等等，相當多元化。

咁點解港英政府又會搞個咁嘅活動呢？話說1967年六七暴動後，港英政府認為要搞個大型活動營造出歌舞昇平嘅氣氛，安撫民心，同埋加強當時後生仔對香港嘅歸屬感，等佢哋唔好再出街搞事。港英政府响1971年同1973年搞多兩屆，之後政府就話達到舉辦目標，然後就無咗下文。