留產所不是流產所

早兩日同秘書食食下飯，大家講緊生仔話題，當阿史講到自己係留產所出世個時，秘書就好似好驚訝咁嘅樣，原來，因為廣東話嘅留產所個「留產」同「流產」同音，所以秘書就誤會咗係「流產所」。唉，阿史我真係畀呢個竹升妹激死！不過又公道啲講，相信好多「90後」都未必聽過留產所呢個名。

講番留產所，係一個專畀大肚婆生仔嘅地方，雖然無醫生，但因為有政府註冊嘅助產士(俗稱「執媽」)幫手生仔，所以點都比屋企生安全。留產所係上世紀初開始响香港出現，以私營為主，但政府亦有開設，由於上世紀中，特別係60、70年代個時出生率好高，醫院又唔多，加上當時嘅婦女基於傳統觀念唔多接受由醫院嘅男醫生幫手分娩(個時無乜女醫生)，所以造就留產所嘅盛行，差唔多梗有一間係左近。但踏入80年代後，出生率開始回落，而且醫學昌明同埋社會觀念亦開放咗，留產所亦漸漸被淘汰，直至上世紀末，留產所已經幾乎响香港完全絕跡。

可以話，相比當時嘅設施，今日嘅產婦實在係幸福得多呢！