講起屈臣氏，相信今時今日無人唔識，藥品啦、飲品啦、洗頭水啦，依加真係愈來愈多嘢賣，而且稱得上係梗有一間係左近(李生係咪應該多謝我一聲？^.^)。但講開屈臣氏，大家又知唔知呢間嘢點嚟？好多人以為係李生開設，其實真係一個美麗嘅誤會囉。阿史最近搵到一張屈臣氏大藥房响1914年印製嘅年曆海報，就由呢張相講起啦！

話說1820年，英國人皮爾森同埋李文斯頓嚟到東方，礙於清廷嘅限制，就先係澳門開設咗「澳門大藥房」，呢間就係屈臣氏最早嘅始祖。到咗1828年，「澳門大藥房」擴大服務，到廣州開設咗「廣東大藥房」。

1841年，清廷嘅兩廣總督琦善私自同意割讓香港畀英國，班英國人再隨之踏上香港，開咗間「香港大藥房」。1855年，屈臣先生（Mr.Thomas Boswell Watson）進入香港藥房擔任經理，後來輾轉間佢嗰侄仔仲接管咗藥房嘅生意。到咗1871年佢仲將藥房改名為屈臣氏大藥房，屈臣氏呢個店名終於誕生嘞！

1949年中華人民共和國成立後，屈臣氏退出咗內地嘅市場，一心一意專注香港嘅發展。此後，屈臣氏愈做愈大，到最後被和記黃埔集團收購，就成為咗今時今日大家都差唔多幫襯過嘅屈臣氏了。

圖片來源：香港歷史博物館