前個排香港同廣東省簽咗份新協議，未來三年香港繼續買東江水，不過就加咗價。有好多香港市民就喺網上鬧政府做乜東江水又加價，仲話唔駛買咁多水。其實好多年輕人無經歷過制水，以為真係一開水龍頭就有水，從來無諗過無水嘅日子係點。

阿史翻查資料，香港第一次實施制水係1895年。為咗解決食水問題，港英政府就喺部分山區興建水塘。不過，香港人口越嚟越多，用水量不斷增加，所以只要出現天旱，香港就好容易制水。其中制水制得最利害係喺1963年，據講當時水塘存量只係夠43日，加上無乜點落雨，搞到要每四日供水一次，好多人要排隊攞水。住喺舊樓嘅人就會叫樓下閂水喉，唔好搞到無水入屋。

為咗增加淡水存量，政府除咗起水塘外，仲開始向廣東省買東江水。後尾香港人口越來越多，東江水就越買越多，成為咗香港淡水嘅重要來源。除咗買水同起水塘之外，其實港英政府仲試過起海水化淡廠，將鹹水變做淡水，不過海水化淡成本好高，八十年代就無再用喇！

所以話，食水對以前嘅香港人嚟講係好珍貴，但而家好多人都唔係好珍惜水資源，如果大家繼續浪費食水，真係驚制水嘅日子會重臨。


圖片來源：香港政府檔案處