警廉衝突

「香港，勝在有ICAC」，呢句宣傳語句相信大家都成日聽到。香港之所以係一個國際著名嘅廉潔社會，廉政公署實在功不可沒。之不過，廉政公署咁多年維護香港嘅廉潔，都面對過唔少挑戰。

1977年嘅10月28日，香港就發生咗一次警廉衝突。可能史友都知道，廉政公署成立之前香港貪污問題嚴重，警隊呢個政府嘅紀律部隊內部都有好嚴重嘅貪污問題。廉政公署成立之後，警隊中好多警員唔理係高層定低層都俾廉政專員請返去飲咖啡。由於當時好多警員都曾經貪污過，所以搞到警隊人心徨徨，加上多次高調走入警署帶走警員，令警員覺得無晒面，因而對廉政公署有所怨恨。1977年嘅10月28日，數以千計嘅警務人員同家屬就响香港警察總部集會，要求政府注視問題，而部分警員更走到去廉政公署執行處，仲同廉政公署人員發生衝突。

事件發生後，港督麥理浩為咗平息事件，最終宣布局部特赦令，對參與小規模貪污嘅警員作出特赦，唔再追究，成功化解呢次危機。後來政府改革公務員福利制度，加上對公職人員貪污有更大嘅規管，紀律部隊效率提升之餘，仲令香港貪污問題得以解決，成為全世界最廉潔同治安最好嘅城市之一。時至今日，大家可以响香港安居樂業，廉署同警隊的確功不可沒。