史友們如果有留意股市行情，睇電視時可能會不時見到香港交易所嘅交易大堂，不過過埋今日，呢個有超過三十年歷史嘅股票交易場地就會關閉，香港金融業發展又進入一個新時代。

香港嘅證券交易最早可以追溯到19世紀中葉，二戰之後，香港證券交易所於1947年成立，重建香港股市。由於當時香港嘅金融同財經行業係由洋人所壟斷，所以香港證券交易所由英國人管理，經紀都係洋人，上市公司也多屬英資企業。呢個局面直至1969年先至被打破，响個年遠東交易所正式成立，令香港股票市場出現劃時代嘅轉變，遠東會其中一個特點，就係為難以响「香港會」上市嘅華資企業提供上市集資嘅平台，新鴻基地產、長江等都係响1971年上市，打破香港會及英資經紀長期壟斷本地股票交易嘅局面。

自上世紀七十時代起，香港證券市場進入咗香港證券交易所、遠東交易所、金銀證券交易所同九龍交易所並存嘅「四會時代」，維持至1986年香港聯合交易所成立前。1986年4月，由四所合併而成嘅聯交所（港交所前身）正式開業。港交所交易大堂可以見證香港金融界嘅高低起跌，好似1987年股災、1997年金融風暴、2008年金融海嘯等，不過前聯交所主席李業廣就講過，覺得呢三十年响港交所發生最重大嘅事可能青島啤酒响香港掛牌上市。

不過，自上世紀九十年代起，電子交易愈嚟愈蓬勃，交易大堂嘅重要性日漸降低，高峰期曾經有一千個出市代表駐場嘅盛況，到咗近期得返幾十個。交易大堂正式完成歷史任務，以後大家應該唔會見到著紅色號碼背心跑嚟跑去嘅出市代表喇。

原圖來源：百度圖冊