睇開周星馳嘅戲，又點會唔識依段對白：「曾經有一份至真嘅愛情擺喺我面前，但係我冇去珍惜，到冇咗嘅時候先至後悔莫及，塵世間最痛苦莫過於此。如果個天可以俾機會我返轉頭嘅話，我會同個女仔講我愛佢。如果係都要喺呢份愛加上一個期限，我希望係，一萬年。」

上面唔少人識背嘅對白，係來自1995年套《西遊記之仙履奇緣》，講到周星馳飾演嘅至尊寶，同朱茵飾演嘅紫霞仙子响後院相遇，當紫霞拎起劍要殺至尊寶，至尊寶就講出依段經典中嘅經典。

套戲除咗依一幕，周星馳响結局飾演嘅武士企响城樓上，同紫霞表白，再加埋盧冠廷《一生所愛》首歌，相信都係戲迷印象深刻嘅場口之一。

眼利嘅觀眾應該注意到，連埋《月光寶盒》在內，兩套《西遊記》系列入面包括水簾洞、牛魔王搶親、「唐僧」羅家英受刑嗰時問旁邊隻牛牛貴姓等等嘅場景，都係比較原始，好似去咗荒漠，其實兩套電影都係响同一個地方拍攝，就係銀川嘅鎮北堡西部影城。唔單止《西遊記》系列，據講《新龍門客棧》、《書劍恩仇錄》、《東邪西毒》等等100多套影視作品，都係响鎮北堡拍攝。

鎮北堡嘅出現令兩座古城堡得到原貌保留，平時我同你都可以入場，去「愛你一萬年」間後院、至尊寶表白嘅城樓，仲有黑風嶺等等，過一過戲癮，甚至學羅家英唱o~only you都仲得。