唔知大家有無聽過「藍精靈 十分勁 反斗激氣真要命 沒法叫暫停」呢首歌呢？阿史好細個果陣經常被呢首歌洗腦，佢就係當時喺《430穿梭機》時段播出嘅《藍精靈》主題曲，不過當時阿史睇咗都無乜印象，係睇咗幾年前嘅電影版《藍精靈》先有返啲記憶。

唔講唔知，原來《藍精靈》已經成60歲！佢喺1958年今日正式喺比利時漫畫家Peyo創作嘅《Johan & Peewit》入面登場，主角原本係兩個武士，而藍精靈只係配角。不過後嚟佢哋大受歡迎，就擔正做主角出漫畫，而漫畫嘅故事係由Peyo同太太一齊構思創作嘅。1959年，《藍精靈》動畫版喺比利時電視台首播，之後仲先後推出電影版——《藍精靈的冒險》同《藍精靈與魔笛》。

至於點解藍精靈係藍色？原來Peyo嘅太太認為藍色同綠色嘅森林背景最和諧，如果用變咗做綠色，佢哋就消失於森林背景之中，「紅色太誇張了，黃色則有種病懨懨嘅感覺，只有藍色最合適！」1981年，美國國家廣播公司搵咗Peyo嘅原班人馬製作美國版《藍精靈》動畫，一共有234輯。而《藍精靈》自推出以來，被翻譯成25種語言文字，漫畫銷量超過2,500萬冊，動畫片更曾經喺60幾個國家播出，深受世界各地小朋友嘅歡迎。《藍精靈》電影3D版仲分別喺2011同2013年上映，不過阿史睇嚟睇去，除咗美芝、智多星等有明顯外形特徵嘅藍精靈之外，都唔係好分得出邊個打邊個。