琴晚提過摩爾多瓦嘅悠閒生活，襯住大家對呢個國家仲有啲印象，今日順手介紹埋摩爾多瓦嘅威水嘢——佢個酒窖。

凡係對葡萄酒略有研究嘅人都知道摩爾多瓦係個葡萄酒大國，係OIV（Organisation Internationale de la Vigne et du vin國際葡萄酒組織）嘅五個創始國之一。

而世界上最大、儲存葡萄酒數量最多嘅地下酒窖就喺摩爾多瓦，佢個名叫Milestii Mici，全長55000米，共儲存咗超過150萬瓶葡萄酒，每年仲不斷會有新酒運入嚟。呢度嘅酒窖大到遊客可以揸車嚟遊覽，好多國家元首、政要都嚟過呢度參觀，係當地一個著名嘅遊覽景點嚟㗎。

摩爾多瓦嘅地形以平原為主，土壤肥沃，加上大陸性氣候特徵，令到呢個國家好適合種葡萄。摩爾多瓦釀酒嘅歷史已經有幾千年歷史，起初釀出嚟嘅酒，因為缺少現代化科技，又冇處理好衞生管理同葡萄酒氧化嘅問題，所以質量相當差。响14世紀以前，摩爾多瓦葡萄酒嘅主要出口國係俄羅斯。自從1812年摩爾多瓦被俄羅斯吞併之後，俄羅斯貴族開始响法國引入新嘅葡萄品種去摩爾多瓦，摩爾多瓦嘅葡萄品種亦越嚟越多，出口嘅國家多咗，令到摩爾多瓦嘅釀酒技術不斷提高。宜家响摩爾多瓦比較出名嘅酒廠有Cricova，DK-Intertrade，Dionysos-Mereni，Mezalimpe，Vinaria Bostavan等等。

雖然阿史對葡萄酒冇乜研究，但講完都突然想飲返杯摩爾多瓦葡萄酒添。