如果話上次講過嘅阿爾巴尼亞係歐洲「貧困戶」，咁今日介紹嘅摩爾多瓦就係歐洲之最，最窮個最。老老實實，阿史喺寫呢個post之前都未聽講過呢個國家（可能聽過但唔記得咗？老喇老喇……）摩爾多瓦係東歐嘅一個小國，就夾係烏克蘭同羅馬尼亞嘅中間。

聽係摩爾多瓦讀研究生嘅史友講，摩爾多瓦雖然唔富有，但當地人嘅生活好寫意，鄰居會經常聚係樓下度飲酒傾偈，週末又會去睇吓話劇，聽吓交響樂（哇，簡直係退休之後嘅生活！）呢位史友話俾阿史知，佢嘅同學仔對功課嘅態度相當散漫，當地人完全冇考試、學習嘅壓力，學習嘅氣氛同香港真係完全唔同！唔知讀緊書嘅史友有冇小小羡慕呢？