肉夾饃

阿史一直聽人講西安嘅肉夾饃好好食，去親一定要食返個先算係去過西安。近排睇啲綜藝資訊節目，又介紹肉夾饃，話佢有幾好食咁，令阿史諗返起幾年前第一次去西安食肉夾饃嘅經歷……

話說嗰日參觀完兵馬俑之後已經到咗食晚飯嘅時間（大陸好多地方嘅晚飯時間都比較早，通常都喺6點就食晚飯，阿史响香港一般8點半先食所以好唔慣），但又唔係好肚餓，就去附近食個肉夾饃頂住肚先。

肉夾饃係西安好常見，一條街有十幾個選擇濕濕碎，阿史揀咗間比較多人幫襯同埋坐得舒服嘅鋪頭，一入去剩係點個肉夾饃。隔離臺啲人多數都係點肉夾饃，望落去賣相唔錯，就更加期待喇。到手嘅肉夾饃暖暖地，都幾大個吓，出面白色嘅饃係冇乜味嘅，咬落去比食開嘅包硬啲，入面嘅肉碎好足料，有肥有瘦，調味都唔錯，就係有小小乾身同埋略偏重口味。