史友們有無發現越南好多人姓阮？咁究竟當中有啲咩故事呢？

起初，阮姓係由中國傳入越南。商朝果陣，臯陶嘅裔孫建立咗個諸侯國叫阮國，商末時期阮國滅國，但其子孫均以國為姓。兩晉之後五胡亂華，當時有好多中原大族逃往南方，其中李、陳、阮等幾大姓氏逃咗去越南。

大概喺宋朝時期，李氏喺越南稱帝，200幾年後越南李朝滅亡，到陳朝建立，但係當時仲有好多李氏嘅人，國王陳守度為咗防止國民懷念李朝，於是迫所有姓李嘅人都改姓阮。類此嘅事又發生咗幾次。1400年，推翻陳朝嘅胡朝被明朝討平，所有胡姓人都改姓阮。1592年，莫朝衰亡，莫姓子孫改姓阮。1778年，鄭氏喺同阮氏嘅百年戰爭入面落敗，鄭氏人都改做姓阮。跟住，越南最後一個封建王朝阮朝建立，阮氏變得更加繁盛。

不過，要值得留意嘅係，喺古代越南，人口最多嘅底層人民一般係無姓氏嘅。所以大部份姓阮嘅人，通常都係貴族或者落魄貴族。

到咗1887年，法屬印度支那形成，阮氏王朝成為傀儡。法國人開始咗第一次人口普查，發現好多老百姓無姓，好難統計，而且喺法國人嚟睇，無姓氏係一件好野蠻嘅事。於是法國人將所有無姓氏嘅越南人都安上咗當時最常見嘅姓——阮。咁樣一嚟，姓阮嘅人就達到咗越南人口嘅40%以上，阮姓亦都從主要嘅貴族姓氏，變做尋常百姓嘅姓。

原來，咁多越南人姓阮，都係被逼嘅。