中意珍珠嘅史友可能會聽過「東珠不如西珠，西珠不如南珠」，咁其實東珠、西珠、南珠又係咩珠呢？東珠係產自日本嘅珍珠，西珠嚟自歐洲，而南珠就產自中國合浦。合浦珍珠圓潤大粒，色澤瑰麗多彩，當地更係世界聞名嘅珍珠產地。

可能唔係好多人知合浦係邊，其實佢係廣西北海市轄下嘅一個沿海小縣。合浦自古以嚟就以盛產珍珠出名，據《後漢書》記載，合浦唔產穀物糧食，靠嘅係產珍珠去同隔離郡縣交換糧食。當地嘅貪官污吏見到有利可圖，不斷用唔同嘅理由叫啲百姓去采珍珠，搞到珍珠嘅產量越嚟越少，好多人因為采唔到珠，換唔到食物而餓死。好彩後嚟有個叫做孟嘗嘅人嚟做合浦太守，佢下令革除弊政，禁止百姓濫采珍珠。後嚟唔夠一年嘅時間，啲珠蚌經過休養生息，又可以繼續產珠，於是，合浦又變返盛產珍珠嘅地方，呢個就係成語「合浦珠還」嘅出處。不過，近年嚟合浦好多珠農急於求成，大大縮短咗育珠同開珠嘅時間，令合浦出產嚟嘅珍珠遠遠比唔上以前咁靚。

除咗珍珠出名之外，合浦仲有個漢墓群，由1957年至今，已經發掘咗超過1200座墓穴，當中以漢墓居多。咦，睇嚟，合浦呢個地方啲風水應該相當唔錯……