唔知呢排史友們有無留意中東地區嘅新聞，黎巴嫩總理哈里里响11月初訪問沙特阿拉伯是時突然宣佈辭去總理職務，仲指責伊朗干涉黎巴嫩內政，又話自己受到生命威脅，宣布辭職。不過，有分析就指今次事件背後係同卡塔爾之前遇到嘅情況類似，牽涉沙特阿拉伯同伊朗响區內嘅政治角力。

黎巴嫩1943年立國，不過响成為現代國家之前呢個地方擁有悠久歷史，早响2000年前腓尼基人就响呢個地區生活，後嚟受埃及、亞述、巴比倫、波斯、羅馬、阿拉伯帝國以及奧斯曼帝國佔領。响第一次世界大戰後法國殖民地，直至1943年獨立成國。

不過，呢個國家自立國後有段長時間處於動盪，好似，以色列又佔領過南黎巴嫰，1975年至1990年間黎巴嫰一直處於內戰狀態，基督徒民兵、什葉派武裝組織、遜尼派武裝組織、以色列、敘利亞、真主黨游擊隊、巴勒斯坦解放組織等都有參戰。後嚟各方响1990年達成《塔伊夫協定》，之後敘利亞對黎巴嫩北部實行長期佔領，南部地區就由以色列控制。2005年，黎巴嫩因總理哈里里被暗殺而爆發咗場雪松革命，黎巴嫩亦結束長達三十年嘅佔領。

之後黎巴嫩重新恢復政治秩序，黎巴嫩政府職位一直係按照宗教交派分配任命：總統係由馬龍派基督徒出任；什葉派擔任國會議長；而總理則是遜尼派，呢個分配其實就係以色列、伊朗同沙特阿拉伯响黎巴嫩嘅政治代理。今次哈里里响沙特辭去總理職務，有評論就認為係因為佢態度溫和，對伊朗同什葉派唔夠強硬，因而被遜尼派王室統治嘅沙特阿拉伯「教訓」。