記得以前讀中史時，响交通史課程當中就介紹唔少中國古代嘅歷險家，咁大家有無諗過，响中國以外嘅世界，一樣有好出名嘅探險家呢？今日要介紹嘅，就係十四世紀著名探險家伊本‧巴圖塔。

伊本‧巴圖塔出生於摩洛哥，家族係一個法律世家。响佢二十歲個年，佢由家鄉前往麥加朝聖，而呢次旅行，亦令佢展開咗一生探索世界嘅旅程。佢最初嘅旅程都係以中東一帶為主。而巴圖塔响麥加居住多年，饒有學識，熟悉伊斯蘭教法，名氣漸大，所以唔少君主好似伊兒汗國同欽察汗國嘅大汗都曾經接見佢，而當時蒙古人勢力已經伸展到歐洲，所以佢嘅旅程範圍開始擴展至歐洲。

去完中東又去完歐洲，佢之後因獲德里蘇丹國邀請，經中亞一帶而去咗南亞地區。後嚟德里蘇丹國蘇丹派人出使中國，巴圖塔就自告奮勇離開德里，經過錫蘭，馬爾代夫、馬六甲海峽後，最終到達中國南方港口城市泉州。後嚟佢從泉州出發，去到杭州沿住京杭大運河北上，最終去到大都。不過佢响大都就見唔到元朝皇帝，無幾耐就離開中國。

離開中國後，佢經南亞去到中東巴格達，再經歐洲伊比利亞半島返去家鄉摩洛哥。而响佢人生最後嘅遊歷，就去咗西非一帶探索馬里帝國，成功見到馬里帝國國王。後嚟佢响收到摩洛哥蘇丹命令回國。返國之後，佢就响佢接近三十年嘅遊歷經過記低，寫成《伊本·巴圖塔遊記》，亦成為咗十四世紀歐亞非歷史一個寶貴史料。

下次史友們如果要去一帶一路國家出遊，不妨睇睇呢本遊記參考下，可能會有更多有趣嘅發現。