响好耐之前阿史介紹過西伯利亞嘅貝加爾湖，呢兩日阿史就見到關於呢個地方嘅報道喇！報道就話貝加爾湖畔土地被中國人大手購入，仲興埋起別墅。有趣嘅係，報道話中國旅遊團嘅導遊都會話貝加爾湖原本係中國嘅領土。咁究竟呢個講法有無問題呢？不如又重溫返呢個地方嘅歷史。

貝加爾湖位於俄羅斯西伯利亞地區，係世界最大嘅淡水湖。呢個湖曾經係外族匈奴、鮮卑、突厥等所屬部族嘅領地，以前漢人叫做北海，蘇武牧羊故事嘅北海，就係貝加爾湖喇！蘇武係漢武帝派出出使匈奴嘅使臣，結果被匈奴扣留，仲話只要佢放牧嘅公羊生到羊仔先會放佢走，意思就係逼佢投降，蘇武一心不辱使節之命，堅持不肯投降，捱咗十九年最終獲釋。

响歷史上，喺貝加爾湖畔生活嘅遊牧民族，同中原政權時戰時和。如果講話呢個地區係由中原政權管轄，就係唐代嘅全盛時期，當時呢個地區歸入安北都護府。而响北宋時貝加爾湖地區係响遼國北部邊界，到咗南宋就成為咗蒙古嘅領土，明朝就被被瓦剌控制。到咗十七世紀，呢個地區先俾沙俄佔領，而康熙時清朝同俄國簽訂嘅《尼布楚條約》，就確認咗貝加爾湖以東地區屬於沙俄。後嚟雍正皇帝又同俄國簽訂《布連斯奇條約》和《恰克圖條約》，最終確認貝加爾湖周邊地區歸為沙俄所有。

咁似乎，話貝加爾湖原屬中國，有啲牽強喎...