細個對於天台嘅印象，除咗玩，仲可以係學校。二戰之後，大批移民湧到香港，令學位緊張。1953年石硤尾大火令一批居民無家可歸，政府當年興建徙置大廈，安置受影響居民。為咗解決適齡學童嘅教育需求，政府就象徵式咁每年收租1蚊，租咗徙置大廈嘅天台畀志願及宗教團體辦學。好似相入面咁，天台小學周圍會有鐵絲網，避免發生意外。話說當年嘅學生已經長大成人，有人回憶返當年返學嘅情景，最深刻係早餐嗰塊餅硬到可以掟人。

圖為李鄭屋邨嘅天台學校。圖片嚟自房屋署網站。