前排睇ViuTV，見到著名烹飪節目主持人甄文達（Martin Yan）上佢哋個節目，啲回憶真係返晒嚟！尤其是佢講嘢嘅語調、切嘢嘅刀功，真係無得頂。睇佢做烹飪節目夠晒過癮，阿史認為好睇過肥媽嗰啲好多！

甄文達生於廣州，13歲嚟香港定居，中學讀民生書院，空閒嘅時候就去舅父嘅餐廳做學徒，學整燒臘。之後甄文達去咗美、加留學，半工讀嘅佢喺當地教中式烹飪，後來得到電視台賞識，邀請佢客串做清談式烹飪節目，結果因為講嘢風趣又擅長控制現場氣氛，節目深受當地觀眾歡迎，加拿大電視台就搵佢主持烹飪節目《Yan can cook》。《Yan can cook》由1982年至今已經拍咗超過1500集，教當地人煮中菜，而佢最出名嘅金句就係 “If Yan can cook, so can you!”，俾外國人知道其實中菜都唔係想像中咁難煮。據講於全盛時期，全球一共有超過120個地區播放甄文達嘅節目。

喺90年代，亞視買咗《Yan can cook》播映權，放喺國際台度播，仲搵咗吳耀漢配音。講開又講，吳耀漢把聲同甄文達又真係幾似！其實除咗烹飪節目，甄文達後來都有主持飲食節目，喺介紹中國各地嘅飲食文化，佢又寫食譜、做過烹飪學院導師等，仲拎過唔少獎項添。話時話，身為煮食達人嘅甄文達認為最好食係咩？答案係媽媽煮嘅煲仔飯，足料又夠香。