早排睇新聞，見到泰國曼谷有間學校請嚟一班「重量級嘉賓」——大象，喺佢哋身上畫上多個參與今次世界盃國家嘅國旗，同學校足球隊嚟一場與別不同嘅球賽，用嚟宣傳唔好沉迷賭波嘅正面信息。

講起大象，佢同泰國嘅淵源好深，傳說佛祖嘅母親摩耶夫人曾經夢到釋迦牟尼坐住蓮花寶座，帶住銀項圈，以白象嘅形象出現，佢輕柔咁撞向摩耶夫人嘅右側腹部。無幾耐摩耶王后就生咗個王子，呢位王子就係後來嘅佛祖釋迦牟尼，所以泰國佛教徒堅信白象係佛祖嘅化身同埋庇護王權嘅象徵，白象依因此被泰國人視為神獸。但白象並唔係指全身純白嘅大象，凡是金黃、銀白、粉紅、嫩綠等膚色嘅大象，如果可以通過皇家鑑別師繁複嘅判定標準，就有機會成為大象中最優秀嘅血緣品種。

經過馴化嘅大象仲曾經係泰國歷史上沙場披甲、身經百戰嘅功臣。泰國古代戰將就以大象為坐騎，白象更加係皇帝出征嘅專屬御坐。